December 13, 2020
Նվերներ Սիրելիներին․ Հաճելի Պարտականություն
Մեզանից շատերը տոներին կարևորություն չեն տալիս, բայց չէ՞ որ դա շատ լավ առիթ է ևս մեկ անգամ ժպիտ պարգևել մեր սիրելիներին և ցույց տալ, թե որքան թանկ ու կարևոր են նրանք մեզ համար։ Իսկ ինչպե՞ս դա անել։ Մեր սիրո և ուշադրության լավագույն դրսևորումներից են նվերները։
Նվեր ընտրելը որքան հաճելի, նույնքան էլ բարդ ու պատասխանատու գործընթաց է․ ի՞նչ գնել, որ ստացողը հավանի, ինչպե՞ս կողմնորոշվել այդքան մեծ տեասականու մեջ։ Ինչի՞ց սկսել։ Իրոք բարդ է, այնպես չէ՞։ Բարդ է, սակայն ոչ անհնարին։ Միասի՛ն համոզվենք դրանում։
Քայլ 1․ Նվերի ընտրություն
Ուշադի՛ր եղեք բնավորությանն ու սովորություններին։
Սա, թերևս, ամենակարևոր հարցն է, որն օգնում է հասկանալ, թե ինչի վրա կարելի է դնել շեշտը։ Բնավորությունից ելնելով Դուք կարող եք հեշտությամբ ընտրել, թե որ կողմ գնալ․ լինել օրիգինալ և իսկապես առանձնահատուկ մի բան փնտրել, թե՞ պարզապես կանգ առնել պրակտիկ նվերի ընտրության վրա։ Կարող եք հարցնել ինքներդ Ձեզ, թե ինչպիսին է այն մարդն, ում համար նախատեսված է նվերը՝ նա առավելապես գործնական և ռացիոնա՞լ է, թե՞ ռոմանտիկ բնավորություն ունի, ակտի՞վ, թե՞ պասիվ կյանք է նախընտրում, սիրու՞մ է ճամփորդել, ի՞նչ ժանրի ֆիլմեր է դիտում, ի՞նչ երաժշտություն է լսում։ Այս և նմանատիպ այլ հարցերը կօգնեն հասկանալ տվյալ անձի խառնվածքը և համապատասխան նվեր ընտրել։Օրինակ, եթե նա սիրում է սպորտով զբաղվել, ապա հավանաբար նոր սպորտային հագուստը կամ ֆիթնես ժամացույցը հենց այն է, ինչ պետք է։ Ձեր ընկերը քաղցրակե՞ր է, ուրեմն արդեն կռահեցիք, թե ինչ նվիրել․ համեղագույն ձեռագործ շոկոլադ, որը հաճելի կդարձնի նրա օրը։
Ի՞նչ հոբբի ունի նա:
Սիրելի զբաղմունքները մեր կյանքը դարձնում են գունեղ ու հետաքրքիր, օգնում են լիցքաթափվել և նոր ուժերով շարժվել առաջ։ Ուստի նվերն ընտրելիս մի՛ մոռացեք նրա հոբբիի մասին։ Բույսերի սիրահարներին կարող եք նվիրել էկզոտիկ ու հետաքրքիր որևէ բույս, որը կդառնա տան անբաժան մասնիկը և երկար ժամանակ կհիշեցնի նվերը ստանալու ջերմ պահը։
Ի՞նչ նվերի մասին է երազում:
Այս մասին կարելի է ուղիղ հարցնել, սակայն սա կարող է խանգարել անակնկալի իրագործվելուն։ Փորձե՛ք անուղղակի հարցերի միջոցով պարզել դա։ Միասին շրջեք խանութներով և հետևեք, թե ինչի վրա է ուշադրություն դարձնում տվյալ մարդը։
Կա ևս մեկ տարբերակ․ հարցրե՛ք նրա մոտ ընկերներից, թե ինչ նվեր կցանկանար։ Կարող եք կիրառել նաև այս հոգեբանական հնարքը․ ասե՛ք, որ արդեն պատրաստել եք նվերը, իսկ նա կգուշակի հենց այն, ինչն ամենաշատը կցանկանար ստանալ։
Պարզապես ուշադի՛ր լսեք։
Այս պարզ խորհուրդն իրականում լավագույն նվերն ընտրելու բանալին է։ «Որքա՜ն կուզենայի ունենալ այս նոր պայուսակը», «Գիտե՞ս՝ սկսել եմ անգլերեն պարապել, ուզում եմ նոր գրքեր գնել» և այլն։ Բոլորս էլ խոսում ենք մեր ցանկությունների և ծրագրերի մասին, ուստի որքան ուշադիր լինեք Ձեր ընկերոջ կամ մտերիմի հետ զրույցում, այդքան մեծ հավանականությամբ նվերն իսկապես նշանակետին կխփի։
Քայլ 2․ Նվերի մատուցում
Նվերի ընտրությունից ոչ պակաս կարևոր է նաև այն, թե ինչպես է այն մատուցված։ Իսկ դա իր մեջ ներառում է օրիգինալ փաթեթավորումից սկսած ամեն մանրուք, որն իրականում ընդհանրապես մանրուք չէ։
Նվիրե՛ք տպավորություններ:
Եթե չեք կողմնորոշվում ինչ նվիրել, ապա կենտրոնացեք ստացողի էմոցիաների վրա։ Ժամանակն է գործի դնել նաև Ձեր ստեղծագործական տաղանդը։ Հիշե՛ք, թե ի՞նչը կարող է ժպիտ պարգևել Ձեր սիրելիին։ Միգուցե ուղղաթիռով օդ բարձրանա՞լը կամ վրանով գիշերակացով պիկնիկ, տանիքում ռոմանտիկ ընթրի՞քը։ Անմոռանալի երեկոն Ձեր ձեռքերում է։
Երբ ստեղծագործելը Ձեզ համար չէ։
Այո՛, դա նույնպես հնարավոր է։ Հնարավոր է՝ իսկապես չեք կողմնորոշվում, թե ինչ նվիրել կամ երկար փնտրտուքների ժամանակ չունեք։ Գումար առաջարկելու փոխարեն կարող եք նվեր քարտ ձեռք բերել։ Սա բավականին պրակտիկ քայլ է, որը միանգամայն ազատում է Ձեզ սխալվելու վախից։
Եղե՛ք օրիգինալ:
Ցույց տվեք անհատական մոտեցում։ Նվերն ընտրելուց հետո հարկավոր է մտածել համապատասխան տուփի և փաթեթավորման մասին։ Սա լավագույն նվերը մատուցելու կարևոր մասն է։ Այս հարցում ևս անհրաժեշտ է հաշվի առնել այն ստացողի խառնվածքը։ Եթե Ձեր ընկերը կամ մտերիմը ակտիվ մարդ է, ապա փաթեթավորումը կարող է լինել վառ գույների մեջ, եթե առավել հանգիստ, ապա ընտրեք մեղմ գույներ և ոչ շատ աչքի ընկնող փաթեթավորում։
Փնտրե՛ք նվերն օնլայն խանութներում:
Նվեր ընտրելը երբեմն շատ ժամանակ է խլում։ Օնլայն խանութներն այս հարցում իսկական փրկություն են։ Դուք շատ արագ և առանց հերթերի կարող եք ծանոթանալ տեսականուն, գտնել նվերներ ամենատարբեր առիթների համար՝ ծննդյան տոնից մինչև Ամանոր, վճարել օնլայն և պատվիրել առաքում։ Ուզու՞մ եք խնայել ժամանակ և կատարել լավագույն ընտրությունը, ուրեմն փնտրեք նվերն օնլայն տարբերակով։
Նվեր ընտրելն, իսկապես, արվեստ է։ Այն ընտրելիս հարկավոր է առաջնահերթություն տալ ոչ թե նրան, թե ինչ եք Դուք ցանկանում նվիրել, այլ թե ինչ է նա ցանկանում ստանալ, ինչը նրան կերջանկացնի։ Այդպես Ձեր մատուցած նվերն, անկախ գնային սեգմենտից, կհիշվի դեռ շա՜տ երկար։
